På tampen av oktober.

Oktober nærmar seg slutten og hausten går snart over i vinter. Her har me stort sett hatt det frostfritt til no så framleis står nokre av blomane eg har ikrukkene frodige og fine. Likevel har hausten sett sitt merke på det meste. Trea er stort sett utan blad, dei ligg strødde utover plenen. Rosehekken ser ut som "brennande tornebuskar" på rekke og rad.

Prinsessespireaen strålar i raudt og gult. Sverdirisen har opna frøkapslane og lar dei gyldenbrune frøa dryssa ut, med håp om at eit eller anna klarer å finne jordsmonn og rotfeste ved foten av morplanta. Rosene er prega av mykje regn, men dei fortset å bløme til frosten stoppar dei. Eg takkar for alle kommentarane eg har fått på dei siste innlegga :) Eg har desverre ikkje hatt tid til å besøke alle tilbake ennå. Ønskjer alle ei fin helg :)

Sjarmør i pels.

Einkvar sjarmør med respekt for seg sjølv har også ei seriøs side, dette gjeld sjølvsagt også Balder :)

Blåøygd, men ikkje dum! Stram kar med fin profil! Blank i pelsen og velfrisert bart :)

Om du har fortent kjærleiken hans,

vil ein katt vere vennen din,

men aldri slaven din.

Theophile Gautier

Katten sit i tunet.

Balder er ein ekte gardskatt som har oversikt over det meste som skjer på garden. Han likar å vere ute og han kjenner kvar ei kro i fjøs og låve. Då eg var ute på fototuren min i går låg han og sov i sola, men vakna då han høyrde at eg kom.

Han strekte seg og geispa. Han myste litt mot sola før han var igong med ablegøyer til ære for fotografen.

Katten

sit i tunet

når du kjem.

Snakk litt med katten.

Det er han som er varast i garden.

Olav H. Hauge

Mellom bakkar og berg.

Her kjem nokre bilde som eg har tatt rundt om på garden vår i dag. Dei to første er frå nabogarden der me leigar. Første bilde viser restene av ei gammal rogn.

Trea strekker greinene mot sola og "snur ryggen til" nordavinden. Før i tida blei alle gjerde bygde av stein her i distriktet. Tre var mangelvare og rotna etter ei tid, stein derimot er varig og det er rikeleg av han. Frå Gullhaug (under) har me god utsikt i alle retningar. Hit gjekk me ofte på søndagstur då eg var lita jente. Mor tok med niste så åt me kveldsmat her på vakre sommarkveldar. Her er det fint å sitte og filosofere. Boknasundet var oktoberblått i dag. Sauene kosar seg i solskinet. Ønskjer alle som er innom bloggen min ei god helg :)

Award og utfordring :)

Eg har fått denne fine awarden frå mi gode bloggvenninne Juni.

Tusen, tusen takk! Håpar at me får det til å treffast "live" om ikkje for lenge :)

Eg blir utfordra til å fortelle sju ting om meg sjølv og å dele awarden vidare til sju andre.

7 ting om meg:

1. Eg er veldig glad i alt som lever og gror i naturen, både dyr, fuglar og blomar.

2. Eg er veldig glad i jobben min i barnehagen.

3. Eg er fasinert av alle årstider, men forventningen om våren og lyset om sommaren er aller best.

4. Eg har tre fantastiske barn, dei er saman med mannen min, dei aller viktigaste i livet mitt.

5. Eg er eit utprega B-menneske, eg likar seine kveldar og søv gjerne til klokka ni om morgonen om eg ikkje må opp før.

6. Eg er sosial og likar å vere saman med menneske.

7. Eg skulle veldig gjerne hatt hatt ei fast turvenninne eller turgjeng som eg kunne gått ilag med to-tre gonger i veka, eg kan vere litt treig til tider.

Så til den delen av awardane som eg likar minst, nemlig å dele vidare. Ikkje det at eg ikkje finn nokon å gje han til, snarare tvert imot. Derfor gjer eg dette på den enklaste måten; eg utfordrar deg som er innom som har lyst å skrive litt om deg sjølv til å ta awarden med deg til din eigen blogg :) Alle de som er innom hos meg og kommenterer titt og ofte er verd denne :)

Ingen nemt, ingen gløymt :)

Aller siste rest.

I dag vil eg vise litt av aller siste rest i hausthagen. Femtunge er framleis frodig og i full bløming.

Scabiosa er ikkje store og prangande, men står som små tuer med slanke stilker og elegante vakre blomar i toppen. Ein einaste einsleg stemor står igjen etter frodige planter tidlegare i sommar. Ein og annan storkenebb heng bokstaveleg tala med nebbet. Montbresia er i dag heilt avblømd, desse bilda er tatt i slutten av august. Blomsterertene blømer ennå sjølv om bladverket er blitt stygt. Humlene er få og trege. Blomkarse har masse flott bladverk, men lite blommar. Blomsterflogene er aktive også no om hausten. Det er masse nyper på rynkerosehekken. I morgon er det jobb og kurs om kvelden. Håpar på finver på torsdag slik at eg kan få ta meg ein fototur i naturen :)