søndag 31. januar 2010

Vinter og sommar, store kontrastar.

Me lever og bur i eit land med store kontarastar mellom årstidene. Eg har tatt nokre "fargelause" bilde i dag og viser dei saman med bilde med same motiv tatt på sommartid.
Blygrå, vil eg kalle dagen i dag.
Bildet under er tatt ein vakker maikveld i fjor. Her kviler takløk under ei lett snødyne. Slik såg han ut sist sommar. Slipesteinen har stått her i mange vintrar og like mange somrar. Når snøen kryp oppover kjellarvindauga, er det godt å sjå fram mot varme og blomeprakt. Vanskeleg å forestille seg at dette kan bli som dette om nokre månader! Eg er spent på korleis staudene klarar seg gjennom vinterkulda.
Kvar årstid har sin sjarm. Og det at me har vinter gjer at eg set ekstra pris på sommaren. Eg må også innrømme at det er godt å puste på og sleppe hagearbeid året rundt. Trur eg hadde gått lei då. Her me bur blir det ikkje så veldig kaldt, så kulda er eigentleg ikkje noko stort problem her. Mørke derimot likar eg ikkje, eg elskar dei lange lyse kveldane me har om sommaren. Snøen me har hatt dette året hjelper på og gjer dagane lysare heldigvis.
Så var januar over, den lengste vintermånaden for meg. Ser fram mot lyse milde vårdagar :)

lørdag 30. januar 2010

Framleis vinter.

I dag fekk me ny påfyll av snø. Slik som dette såg det ut frå vindauga tidleg i dag. Kaldt, kuling og snøfokk. Lite utlokkande med andre ord.
Snøen klistra seg til ruta. Eg såg for meg at dagen skulle fyllast med litt husarbeid, strikking, lesing og blogging. Dørstokkmila var ekstra lang. Då plinga det inn ein melding på mobilen, "skal me kle oss godt og gå tur?" Der var dørstokkmila borte gitt og det bar ut i "rokk og fokk og is". Då me kom inn i skogen stilna vinden og det slutta å snø. Me gjekk gjennom urørt florlett nysnø. Snøen hang på buskar og tre. Kamera låg sjølvsagt heime, eg var redd for å få snø og væte inn i det. Eg kom aldri på at veret skulle bli så fint.
GOD HELG :)

tirsdag 26. januar 2010

Små detaljar.

Litt macrobilde av is i dag.
Under snødyna ventar eineren på vårsola. Vinteren held framleis stand her i sørvest.
Litt laber bloggaktivitet for meg for tida, livet handlar om litt av kvart anna også :)

fredag 22. januar 2010

Nye gardiner i huldreberget.

Er det huldra som bur bak desse fantastiske "tyllgardinene" mon tru?
Det er godt eg ikkje skal bu i dette huset! Det durar i omnen og er godt og varmt hos meg :)
GOD HELG FOLKENS :)

onsdag 20. januar 2010

"Guds kyrkja lysa skulle som høgt på berg ein stad."

Bokn kyrkje, her samlast menneske til høgtid og glede og her samlast menneske i sorg for å ta avskjed med ein av sine kjære. Eg har mange gode og nokre såre minne herifrå.

lørdag 16. januar 2010

Frøken frost.

Her kjem mitt bidrag til konkurransen hos Moseplassen.
Eg presenterer med dette frøken Snøkrystall! Ho er kledd i kvit tidlaus vinterdrakt påsydd små paljettar som reflekterer sollyset om dagen og måneskinet om natta. Kikk innom hos Moseplassen for å stemme på dei ulike vakre Frøken Frost kanditatane :)

torsdag 14. januar 2010

Blåtime i eit rosa skjær.

Bilde tatt frå (om)vegen eg titt og ofte tar heim frå jobb.
Det er eit fantastisk turver no om dagane :)

tirsdag 12. januar 2010

Orkideer.

Kaldt ute, men tropevarme inne, iallefall utpå kvelden, hehe. Så om alt er visna og brunt ute er det frodig i glaskarmane inne. Tusen takk til Stine for tips om svart paspatour :)
Eg hadde tenkt å fotografere då eg gjekk turstien heim frå jobb i dag, men gløymde kamera i garderobeskapet mitt. Håpar på like fint ver i morgon og ikkje minst at eg hugsar kamera.
Takk for alle tilbakemeldingar eg får :) Ønskjer alle gode dagar i vinterkulda! Har du tid og helse til det så ta deg ein tur ut og nyt vinteren :)

søndag 10. januar 2010

Sugen på kunnskap.

Den 3.01 2010 kl 10.20 er dette bildet tatt. Det er seint lyst og tidleg mørkt i januar, men sola har snudd så det går rette vegen!
Dess meir eg lærer om fotografering dess meir ser eg kor lite eg kan. Derfor stod fotobøker på ønskjelista til jul. Resultatet blei to eksemplarer av Digital fotografi i praksis av Magnar Fjørtoft. Eg bytta den eine inn i Bedre bilder av Åshild Fagervik. Eg har skumlese i begge i helga og her er det mykje å sette seg inn i. Til no har eg fått fleire ting på ønskelista, mellom anna fotoshop av eit eller anna slag og fleire linser. Skulle gjerne vore med i ein fotoklubb også, må prøve å finne ut om det er eit eller anna som ikkje er for langt borte frå her eg bur. Største ønske er masse inspirasjon, overskot og lyst til å komme ut med kamera. Eg har ofte store planar, men dei blir ikkje alltid sette ut i livet. Det viktigaste er jo å kose seg med å ta bilde og ikkje stresse.