søndag 31. mai 2009

På ville vegar.

Klokkeblåstjerne er nesten som ugras å rekne, dei veks både der dei er velkomne og der dei ikkje er ønskja. Dei fleste er blå, men kvite, rosa og lilla er også vanleg.
Der eg har kasta noko av det eg har luka bort kjem det snart ein ny bestand. Her (dei tre neste bilda) blei det for ti-femten år sidan sett ein bukett klokkeblåstjerne på grava til ein "høgt elska og djupt sakna" undulat. Dette er ikkje inne i sjølve hagen, men kan sjåast frå hagen. Her får dei spreie seg som dei vil. Småhjarte og judaspenger dukkar også opp rundtomkring. Me har eit nydeleg ver her hos meg i helga, herleg å vere ute :)  
Ps. Eg må komme med ei lita tilføying. Eg meiner ikkje at klokkeblåstjerne er ugras, men dei spreier seg som ugras. Løkane er veldig djupt nede i jorda og er vanskelege å fjerne der dei ikkje skal vere.

fredag 29. mai 2009

ABC- M for mose.

På ABC-bloggen til Petunia finn du fleire m-innlegg :)

tirsdag 26. mai 2009

Wild apple flowers. / Villapalen blømer.

Noko av det aller vakraste eg veit om i planteverda er epleblomar. På garden vår står ein villapal i full flor i desse dagar. Eg kunne godt tenkt meg denne i hagen.
Det veks ein liten apal ved den store. Hadde eg oppdaga han då han var mindre skulle eg ha flytta han inn i hagen.  Denne største stod her også då eg var liten. Takk for alle koselege kommentarar eg har fått i det siste og god onsdag :)

søndag 24. mai 2009

Garden time.

Eg vil gjerne be gjestene mine med på ei hagevandring her hos meg. For dei som synest det blir litt hakk i plata og at eg viser det same omatt og omattatt; klikk deg ut :) Alt som lever, spirer og gror er grunnen til at eg laga meg blogg så her er det stort sett det du får.
I fritida mi er det stort sett "garden time" frå tidleg vår til seint på hausten for meg. Sløyfestråle eg har i garden time bøtta på trappa er yndig. På kvar side av inngangsdøra står krukker med spanske margeritter og bacoba. Potta med takløk og sedum er gammal, ho har vore farmor si for lenge sidan. To små piggsvin bur også her. Gåve. Ampelkorgene er henta opp frå kjellaren og har fått nye planter. Million bells blir finare og finare utover sommaren. I to amplar har eg planta verbena med ulike fargar saman. Dei har ei skjønn lukt som kjennest ekstra godt på stille, varme sommarkveldar. Tre sinkstampar i ulik størrelse. Den største brukte mor til å skylje klede i då eg var lita jente. Det blei ofte lite vatn i brønnen vår om sommaren og då bar ho heile vasken til ei kjelde og auste vatn frå kjelda og oppi baljen. Mjølkespannet hang saman med andre til kjøling i same kjelda. Vatnet i den kjelda er det beste eg har smakt. Gode barndomsminne for meg, men strevsamt for mor og far. Diascia blømer til langt på hausten. Denne kassen pleier eg alltid å sette kvite margeritter i, litt utpå sommaren fyller dei heile kassen. I krukkene sør for huset har eg planta sløyfestråle og blå og kvit femtunge. Millon bells i sykkelkorgene treng nokre veker for å vise skikkeleg ennå. Krypjonsokkoll veks ved sykkelen. I ei lita hole i berget har eg planta steinsame, han er strålande knallblå. Oversikt over litt av hagen. Nærbilde over bedet framfor berget. Her er litt stauder, i tillegg har eg planta løvemunn. Dei står i knopp og blømer snart. Sneglane er ikkje noko særleg glad i løvemunn og det er ein stor fordel. Vintergrønt er fint året rundt. Ulike nyansar av grønt. I bedet framføre det vintergrønne har eg tatt opp tråden med ulike grønne nyansar. I steibedet har eg mellom anna snøsløyfe, vårfloks og blåpute. Storkenebb. Same sort storkenebb som blømer. Eg har masse strandnellik. Han stortrivst så eg deler og deler. Vårfloks. I bergsprekkene har eg sett takløk i ulike fargar. Eit oversiktsbilde til, dette er til venstre for det første oversiktsbilde. Det er kome litt nytt i blom i stauderabatten. Akeleie i ulike variantar står i knopp og eit par sorter har sprunge ut. Dei fire neste bilda er tatt ved granstubben. Nedfor huset blømer snart lupiner. Ja-benken rett etter at han kom opp. No er det kome blom i urna. Diascia i ein nyanse som vil passe godt til skaugumbegonia og ringblom som er sette og sådde i dei terrakotta-farga verandakassane. Skjell er fint å pynte med synest eg. Takløk i ei gammal skei på steinbenken. Gamle hestesko passar fint til å plante takløk inni. Til sist ein nykommar i hagen, ein syrinbusk. Syrin høyrer med i ein hage på landet.
Håpar at du har kosa deg her saman med meg :)
Om du tar turen "forskikkeleg" skal du få ein kopp kaffi også :)
Ha ei fin veke :)