Solskinsdagar sist i september.

Dei siste dagane har me hatt strålande vakkert ver her i sørvest! I ettermiddag varma sola skikkeleg og det var deilig å vere ute :) Aldri er himmelen blåare enn i klare skyfrie haustdagar.

Trass i regnfulle veker er det framleis litt som held stand i hagen. Nostalgirosa er stor og frodig og ber ikkje preg av regnet me hadde tidlegare. Hortensiablomane over og under er på same busk. Montbresia har også blomar igjen heilt ytterst på stilkane. Frø av judaspenge (under). Det er frodig utanfor døra. Får håpe det blir lenge til frosten øydelegg dette. Medan eg går rundt med kamera kjem denne karen ruslande. Balder likar å posere, men han bryr seg nok døyten om bilde. Han er berre ute etter kos :) Me kosa oss i sola ei stund, eg i stolen og han under :) Til sist vil eg gjerne takke for alle positive tilbakemeldingar eg har fått på bilda i innlegget under dette!

Nyt hausten :)

Med tanke på utstilling.

Etter vennleg påtrykk frå BeritT har eg med bevande hjarte meldt meg på Kolnesutstillinga. Det er første gong eg har våga meg på noko som dette så det er veldig spennande! Dei siste kveldane har eg leita og sila ut bilde som kan vere gode nok og som kan vere av interesse for dei som skal kjøpe. I kveld har eg bestilt bilde på nett. Er veldig usikker på kor mykje eg får selt. Kanskje blir det bilde i gåve til slekt og venner til jul og fødselsdagar i årevis framover, hehe. Eg har leika meg litt i photoscape og viser bloggleserane mine eit utval av bilda slik eg håpar å presentere dei på utstillinga 30. og 31. oktober.

Eg har mange jern i elden for tida så det blir lite tid til blogginnlegg/bloggsurfing, men det kjem nok rolegare dagar og då kjem eg sterkt tilbake :)

Fine haustdagar til deg som kikkar innom til meg :)

Sol, søndag og nesten sommar :)

Så har me snudd kalenderbladet over på september. Sjølv om me har vore så heldige at me har hatt sommarvarme dei siste dagane kjenner me at lufta er skarpare og ser at fargane er klarare. Om morgonane ligg doggen som eit sølvteppe over landskapet og om kveldane blir skuggane lengre enn tidlegare. Sjøen speglar knallblå himmel.

Søndag ettermiddag varma sola godt. Hauststaudene står frodige og fine etter at godveret har fått varma dei etter alt regnet me hadde for ei stund sidan. Motlyset fasinerer meg. Eg sette meg i kosekroken med augene igjen og kjende korleis sola varma. Humlene surra, dei var travelt opptatt med å leita etter nektar i blomane rundt meg. Blomane i amplane eg hengde opp i slutten av mai har vakse seg store og kraftige. Også på plattingen over den gamle kjellartrappa er det frodig og fargerikt. Eg høyrer ein stille sus i tretoppane frå ein lett bris. Eg sit i livd og berre av og til kjenner eg eit lite vindpust stryke meg over kinnet. Eg høyrer rop og latter frå barn som leikar legre oppe i bygda. Nokre småfuglar kvitar. Eg opnar augene og legg merke til at telefonstrengen der det for eitpar dagar sidan sat svaler som perler på ei snor nå er aude og tom. Dei trillande strofene har tagna. Svalene er nå på vengene mot sørlegare breiddegrader. Eit streif av vemod når meg...

Kvar vart det taa alle dei

Fuglar,

som song

i Sumar so vænt millom

Greino?

Sidan eg høyrde deim

ender og Gong;

og so vart det Stilla i eino.

— Han tagnar, Fuglen, mot

Hausten.

Per Sivle

~~~~~~~~~~~~

Ein sommar er over, eg opnar armar og sinn mot hausten, ønskjer han velkommen og pustar han inn i fulle drag :)

Sol og nesten sommar :)

Så kom sommaren tilbake for ei lita stund :)

Herleg!

Eg har luka og pusla med blomar i heile dag.

Her er noko av det som framleis held stand i hagen hos meg.

GOD SØNDAG :)