onsdag 30. juni 2010

På rett plass.

Det er mange hensyn å ta om plantene skal trivast og hagen bli frodig. Her har eg lært gjennom prøving og feiling og eg har fått masse tips og kunnskap i gode bøker og ved å lese hagetidende. Det er også fine tips å hente på hagebloggar rundt om.
Form- og fargesamansetnad har mykje å seie for heilskapen. Nokre planter vil ha det godt drenert og klarer seg med eit minimum av vatn slik som takløk. Ein type timian har også fått plass her. Fleire sorter sedum likar seg også der det er tørt og klarer seg med minimalt med jord. På meir skuggefulle stader(her er det sol deler av dagen) er det fint med kvite blomar fordi dei lyser fint opp. Her har eg sett skogsymre, den med dei små blomane er potentilla alba kvitmure. Bregna under har kome av seg sjølv og passar godt der ho står. I sprekker i berget har eg planta krypfredløs, denne er det dessutan greit å ha litt under kontroll sidan han spreier seg med lange utløperar. Krypfredløs likar det eigentleg litt meir fuktig enn han får det her når me har lengre tørkeperiodar, men då vatnar eg litt samstundes som eg vatnar krukker og amplar. Det er alltid noko nytt å lære og hagen er i stadig endring, det er det som gjer det så spanande :)
I morgon skal eg handle nokre roser og supplere der som frosten for hardt fram i vinter.
Ha ein fin 1. juli :)

søndag 27. juni 2010

I krukker og kar.

I dag her me eit strålande sommarver her eg bur. I hagen trengs det ei hand både her og der. Der det lever og gror er det ikkje stillstand. Det er ikkje berre blomane som trivst, det gjer ugraset også! Då er det greit med det som står i krukker og kar, der kjem ikkje ugraset til på same måte. Men så er det fordeler og ulemper med alt for her må det vatnast. Dagleg! Og gjødslast ofte sidan moldmengda er avgrensa. Nå skal eg ut og pusle litt. Ingen store oppgåver i dag. I dag er det søndag og søndagane skal eg berre nyte, sitte i sola og sjå på det vakre rundt meg. Kanskje klippe og knipe litt visne blomar. Sjå på svalene sin akrobatiske flukt og høyre på den sprudlande sangen når dei set seg på ein straumkabel for å puste på og lovprise dagen og livet. Høyre på humlesurr og sjå på sommarfuglar som flagrar rundt på florlette venger.
Seinare i dag skal eg på hagebesøk til mi gode venninne Berit :) Gler meg til det :)
GOD SØNDAG :)

torsdag 24. juni 2010

Sverdiris i ein pytt.

Der er ei lita hole i eit berg i hagen der vatnet blir ståande, der har eg planta sverdiris og fylt bekkeblom. Av ein eller annan grunn blømde ikkje bekkeblomen i år, men det er heldigvis liv i han. Irisen er sterkt gul og har i tillegg eit vakkert lauv i lysegult og grønt. Bladverket visnar ikkje ned etter bløminga slik som det gjer med mange irisar, men står fint heilt til frosten tar det.
Iris pseudacorus 'Variegata'
Eg har vore til realkompetansevurdering i dag. Synest sjølv at det gjekk bra, men får resultat og vite kva eg treng vidare i morgon. Nå har eg lese kvar ledige stund i det siste så i helga blir det husarbeid og det nødvendigaste i hagen. Men må jo slappe litt av med blogging også :)

søndag 20. juni 2010

Snart er det midtsommar.

Synest at eg nettopp gjekk og lengta etter vår og nå er me komne til 20. juni. Neste veke er det solsnu og dagane vil sakte, men sikkert bli kortare igjen. Å, men eg elskar denne tida når "netter er ljose som dagar", det skulle berre stoppa ei stund :) Dagane blir korte om dei er aldri så lange :) Akkurat nå les eg kvar ledige stund, eg skal "opp i" realkompetansevurdering på torsdag med tanke på å bli barne- og ungdomsarbeidar når eg får nok teori og praksis til å ta fagprøve. Litt friminutt må eg jo une meg så eg hadde ein liten kamerarunde mellom øktene.
Sibiriris og skogskjegg står på det aller finaste nå ved Jonsok. Rynkerosene er også godt igong med bløminga. Lupiner i friske fargar lyser opp langs eit steingjerde. Heilt ute til høgre ser du fuglemathuset, på neste bilde ser du dette heilt til venstre. Om du ser for deg desse bilda ved sida av kvarandre får du eit "panorama"-inntrykk. Huset ligg til høgre for dette igjen. Frå stauderabatten. Ønskjer alle hagegjester ei fin sommarveke :) Takk for alle kommentarar eg har fått på dei siste innlegga, håpar og trur at eg får tid å besøke og kommentere tilbake etter at eg er ferdig med vurderinga :)

torsdag 17. juni 2010

Lukta av syrin er det beste eg veit!

Lukt av syrin og lyden av humlesurr, mmm, herleg!
Eg har hatt kvalitetstid i hagen i dag :)
Plenklypping, vatning, ompotting av ein blom, pynting med dei nye blomane eg fekk til dagen min og så godstolen med kaffi og ein ispinne i solveggen :)