Saman med Berit på fotojakt.

I går hadde eg besøk av mi gode venninne Berit. Som den rause dama ho er hadde ho i tillegg til dei vakre påskeegga eg hadde bestilt av henne også med seg ein skjønn kylling og ei potte med perleblomar.

Perleblomar er eit av dei vakraste vårteikna eg veit om. Desse står no i kjøkkenvindauga mitt og strekker seg mot vårlyset utanfor. Seinare når dei er avblømde skal eg finne ein stad i hagen for dei slik at dei kan glede meg fleire vårar. Sidan både eg og Berit likar fotojakt i naturen bar det ut på tur. Veret var grått med litt yr i lufta, men det klarna delvis opp ei stund medan me var ute. Vinteren er iferd med å sleppe taket her i sørvest. Ennå er det ikkje så mange grøne spirer å sjå, men det hindrar ikkje to damer på tur i å finna noko "å jakte på". Me gjekk utanom allfarveg gjennom vakkert landskap. Me leita mellom anna etter vårteikn. Det var ikkje så mykje å finne ennå, men litt fann me. I tillegg fann me mykje som me vanlegvis går forbi når blomar og strå fangar merksemda. Eg har mange bilde på lager som eg vil dele opp i fleire tema i dei næraste dagane. Følg med :)