Tankar og fabuleringar.

I det siste har eg gjort meg ein del tankar om det å sette menneske i båsar. Dess mindre me veit om menneske dess lettare er det å finne rett bås. Ein tankekross. Eg vil dele litt av mine subjektive tankar, heilt sikkert farga av min eigen ståstad. Eg kjem med påstandar, den eine påstanden er like rett/feil som den andre. Det eg vil fram til at er at me bør tenke oss om før me generaliserer og "trer hattar ned over hovudene på folk". Eg brukar alfabetisk rekkefølge, elles er det "hulter til bulter".

Avholdsfolk:

Festbremsar som er ute etter å forsure einkvar fest og som meiner at ein er på god veg til å bli alkoholikar om ein har vin til laurdagskosen.

Treng ikkje alkohol for å dumme seg ut, klarer det godt utan.

Tåler ikkje alkohol eller har eit "føre var" prinsipp grunna alkoholisme i nære relasjonar.

Byfolk:

Urbane, kulturinteresserte, motebevisste og verdsvante.

Ignorante menneske som ikkje veit noko om landet nord for Sinsenkrysset.

Samansette av folk frå heile landet, ja heile verda.

Bygdefolk:

Menneske med nisselua godt nedover både augo og øyrene og med klede frå i fjor og briller frå åttitalet.

Menneske som har valt det gode liv på landet langt borte frå stress og mas.

Bygdedyret lever i beste velgåande, det kakkar alle som vil opp og fram i hovudet.

Bønder:

Sidrumpa einstøingar som aldri "blei noko" anna enn sofasliterar med sugerøyr i statskassa.

Hardtarbeidande "bedrifteigerar" som må kunne litt om det meste.

Personar som "elskar" husdyr og "hatar" rovdyr.

Frp-sympatisørar:

Grunne, enkle personar som tenker "meg og mitt" og som har lettvinte løysingar på det meste.

Partiet som har nøkkelen til eit trygt og rettferdig samfunn utan "barnepikementalitet".

(her slit eg verkeleg med å ikkje sette i bås)

Kristne:

Du skal ikkje-, Du skal-, dømande menneske som trur dei er betre enn alle andre som ikkje er som dei.

Menneske som deler med dei fattige, som går omkring og gjer vel.

(Ein tankekross for meg er at dei som ropa høgast på ytringsfridom då Muhammed-teikningane var på dagsorden er dei same som vil stoppe TV2 frå å sende "Dei sju dødssyndene". Ytringsfridom?)

Muslimar:

Terroristar som berre ventar på å få "ta over" den vestlege verda.

Menneske med rett til å utøve sin religion.

Overvektige:

Desse menneska går rundt som synlege bevis på manglande viljestyrke. Det er jo "berre " å trene meir og ete mindre. Piece of cake.

Overvekt handlar om arv og ikkje minst kjensler. (Alle veit at Jeppe drikk...)

Finn trivselsvekta og bli lukkeleg!

Politikerar:

Maktsjuke, arrogante menneske som vil forme verda etter sitt hovud.

Personar med målretta løysingar for eit betre samfunn for alle.

(ei gammal dame eg kjente sa eingong; "alt hadde vore betre om eg hadde styrt, men då skulle eg styrt åleine!!!")

Sosialklientar:

Udugelege menneske som har seg sjølve og takke for at dei er der dei er.

Ikkje alle klarer å fungere med dei regler og normer samfunnet er bygd på.

Arbeidslivet må leggast til rette slik at flest mogleg kan klare seg utan sosialhjelp, men jobbe i staden.

Psykiatriske pasientar:

Farlege menneske som når som helst kan trekke fram ein kniv.

Psykiske lidingar er like ulike som annan sjukdom og mange blir også heilt friske.

Mange av oss opplever psykiske påkjenningar på ein eller annan måte i livet, sjølv om me aldri får ein diagnose.

Dette er nokre av dei tankane som surrar i hovudet ein søndag føremiddag i november. Kanskje det er på tide å rive nokre av skigardane me omgjev oss med. Me treng å trekka nisselua så høgt opp i pannen og ta bort skylappane slik at me ser dei me omgjev oss med som heile menneske. Menneske med tankar, kjensler og med like stort menneskverd som oss sjølve. Dei er vår neste uansett kva "leir dei bur i"!

PS. då eg leita på internett etter bileta eg har brukt i dette innlegget kom eg over eit anna innlegg om å setta menneske i bås. du kan lese det her om du har lyst.