Helgemodus.

Det er heitt på jobb om dagen, men det er herleg med sommarvarme når eg har fri. Når eg kan sitte og slappe av under ein parasoll på dagtid og sitte ute i dei små timar saman med gode venner utan å fryse er det berre herleg. Å legge noko godt på grillen, steike poteter som er pakka i folie i glørne, lage ein god salat og servere jordbær med fløyte til dessert er det som ein liten miniferie. Når ein av gjestene i tillegg tar på seg jobben som grillmeister er det perfekt! At me i dag måtte ut å samle sauer og køyre dei på nytt beite fordi ein hadde funne eit smutthol frå beitet og inn i naboen sin hage skal eg ikkje snakke så veldig høgt om, hehe. Kor lenge var vel Adam i "Paris"? Helga er ikkje over ennå, eg skal ikkje vere på jobb før klokka sju i morgon :)

ABC- R for revebjelle.

Q-en hoppa eg glatt over sist helg, men no er eg på banen igjen. Rosene står i full flor hos meg no og kunne passa godt i eit R-innlegg, men eg har lenge tenkt at R-en skulle vere revebjeller. "Ville" revebjeller veks overalt i hagen, høgreiste og vakre blomar som tåler mykje vind. Dei er lette å luke bort der eg ikkje vil ha dei. Dei er toårige, første året kjem det berre ein bladrosett året etter blømer dei og døyr om hausten. Fleire ABC-innlegg på ABC-bloggen til Petunia :)

Rosene blømer.

No blømer rosene i hagen. Rosene er dei aller vakraste blomane hos meg.

Eg har ei "prestegårdsrose" som sikkert er nærare hundre år gammal. Eg veit ikkje namnet. Knoppane er lys rosa, men blir melkekvite etter som dei opnar seg. Rosa er rotekte og det kjem stadig nye rotskot. For eitpar år sidan dukka det opp ei grein med enkle roser, vakre dei også. Rosa blømer overdådig og luktar himmelsk! Eg har eit espalie framføre rosa der eitpar breiskolm klatrar (det grøne midt på bildet). Vidare følgjer bilde av mange av dei andre rosene i hagen. Kvar ledige stund blir brukt i hagen for tida, i dag har eg brukt fridagen til å luke alle bed. Herleg ver her, 22-23 gr. Eg likar det betre enn 28 som me har hatt dei siste dagane.

Nyt dagane :)

Campanula

Blåklokker er nokre av favorittane mine i hagen. Uheldigvis er dette sneglesnadder så dei fleste står i krukker og kassar der det er vanskeleg for sneglane å kome til.

Desse to første bilda er av knoppane til fagerklokke, Campanula percifolia 'Grandiflora' Betlehemsklokke, Campanula isophylla (under). Dei fem neste bilda er av fagerklokke Campanula percifolia 'Grandiflora'. Desse står i staudebedet og blir ganske høge med store klarblå klokker. Ei og anna 'Alba' innimellom (kvit). Stjerneklokke, Campanula poscharskana har eg i trekassar og krukker. Dei har lange hengande stilker med masse stjerneforma klokker. I korga framme på sykkelen eg har til pynt har eg krypklokke, Campanula portenschlagiana (dei tre siste bilda). Campanula er lette å få til. Dei treng ikkje mykje gjødsel og dei fleste tåler godt tørke. Om du ikkje har problem med masse sneglar er det greie planter i hagen. Her hos meg overlever dei vinteren greit, men me har svært milde vintrar her.

"Når netter er ljose som dagar..."

Midtsommar, sol og varme. Sommaren har kome for fullt! Sola skin til seine kveld og ho er oppe grytidleg om morgonen. Dei fem første bilda blei tatt onsdag rett før midnatt.

Fredagkveld klokka halv åtte, 23,5 gr. Ei lta skøyte tøffar gjennom Boknasundet. Boknafjorden ligg speglblank i sør. Revebjøller og markjordbær veks langs landevegen. Det er grønt og frodig rundt Boknabergsvatnet. Klokka er mellom halv tre og tre då eg ruslar same vegen tilbake. Det er tropenatt, fuglane er begynt på morgonsongen sin. Boknafjellet speglar seg i Boknabergsvatnet. Boknasundbru ligg opplyst nede til høgre på siste bilde. Heimdalhagen er fullt med vivendelange og fuglesong då eg kjem heim.

Vi skal ikkje sova bort sumarnatta, ho er for ljos til det.

Nå skal vi vandra isaman ute, under dei lauvtunge tre, under dei lauvtunge tre.

Nå skal vi vandra isaman ute, der blomar i graset står. Vi skal ikkje sova bort sumarnatta, som kruser med dogg vårt hår, som kruser med dogg vårt hår.

Vi skal ikkje sova frå høysåteangen og grashoppespelet i eng, men vandra i lag under bleikblå himlen til fuglane lyfter veng, til fuglane lyfter veng.

Og kjenna at vi er i slekt med jorda, med vinden og kvite sky, og vita at vi skal vera isaman like til morgengry, like til morgengry.

Lyrics: Aslaug Låstad Lygre

Kunstgras

Se nøye skal du øyne det store i det små,- seg guddomstanker høyne på gressets veke strå.

Ukjent.

Det er sommar, det er sol og det er søndag.

Det er framleis kjølig vind frå nord her i sørvest, men sola skin. Onsdag hadde me kuling frå sør og ei skikkeleg rotbløyte. Det har vore tørt lenge så vatnet var etterlengta av alt som gror. Lupinene blei piska flate, men dei strekker blomane opp mot lyset. Eit av desse almetrea står innanfor hagegjerde, dei andre rett utanfor. Dei er høge, majestetiske og vakre. Sibiririsen har vore på det vakraste denne veka. Staudebedet er frodig etter regnet. Løvemunn og akeleier. Strandnelliken trivst i bergsprekkene.

Kaffikroken.

I sinkbaljane er det full flor. Tusen takk for alle kommentarar! Eg har som mål å "stikke innom" hos dykk alle :)

God midtsommarveke!

ABC-P for palett.

P for naturen sin eigen fargepalett.

På ABC-bloggen finn du mange kreative p-innlegg :)

Homemade cakes. / Heimebakst.

Det er ikkje ofte eg bakar for tida, men når eg har fødselsdag må det vere heimelaga kaker.

Om nokon andre har lyst å bake desse kakene skal de få oppskriftene her:

"Verdens beste rullekake"

5 eggekvitar

2 dl sukker

I pk vaniljesaus (eg brukte Freia til koking)

mandelflarn/hakka mandler til å drysse oppå

Pisk eggekvitar litt, tilsett sukker og pisk stivt. Rør forsiktig inn vaniljesauspulveret.

Kle ei langpanne med bakepapir og pensle med litt olje. Stryk marengsmassen jamt utover og dryss på mandelflarn.

Steik ved 170 gr i 15-20 min. Avkjøl på rist. Snu mandelsida ned på bakepapir og trekk av papiret som kaka er steikt på.

Fyll:

3 dl kremføyte piskas, bland i 2-3 dl friske eller halvtinte bær(med litt sukker) eller rørt syltetøy. Ha på fyll og rull saman. Ikkje fyll kaka forlenge før servering for då har ho lett for å bli blaut.

Etter at du har laga denne kaka sit du igjen med fem eggeplommer som du kan lage heimelaga is av. Pisk eggeplommene saman med fire ss sukker. Skrap frø or ei vaniljestang og bland i. Vend blandinga saman med 3 dl piska kremfløyte og frys.

Heimelaga is passar ypperleg saman med eplepai og her er oppskrift på ein god og lettvint pai:

300 g (5dl) kveitemjøl

180 g (2dl) sukker

1 klype salt

175 g smør, kjøleskapskaldt

1 egg, kjøleskapskaldt

1-2 ss vatn

Bland mjøl, sukker, salt og smør i terningar til ein gryna masse i kjøkkenmaskin. Tilsett egget og vatn og bland det raskt i. Trykk deigen jamt utover og oppover kanten i ei rund form, prikk og sett i kjøleskapet. Skrell og skjer i båtar rikeleg med syrlege eple. Ta deigen ut av kjøleskapet og ha i ein pakke Tine ferdig vaniljekrem (eller krem du har laga sjølv), legg i eplebåtar tett i tett slik at det dekkar kremen. Dryss på hakka hasselnøtter og steik ved 200 gr på nederste rille i ca 40 min. Server (gjerne litt lunka) med vaniljeis.

Lukke til! Håpar det smakar :)

Tusen takk :)

Tusen takk for gode fødselsdagsønske både på facebook, blotanical og her på bloggen! Eg hadde ein flott dag i går! Først vanka det klemmar, godord og kake på jobb. Då eg kom heim låg det ein pakke som var kome med posten og venta på meg. Eg venta ingen presang i posten og pakken var utan avsendar utanpå så dette var eg spent på.

Det viste seg at gåva kom frå Astrid som har bloggen Eit A4-liv. Eg vann ei trekking der for ei tid sidan, men det hadde eg heilt gløymd. Det passa jo godt at gåva dukka opp akkurat på fødselsdagen min :) Tusen takk! Eg fekk to nydelege lysglas, ein fin glatt stein med velkommen på og serviettar med roser på. Lysglasa kjem skikkeleg til sin rett med tente lys i. BeritT er ei god venninne og ho hadde med seg to vakre småbøker som ho hadde dekorert sjølv. I tillegg fekk eg fine lysglas til hagebordet og keramikkfuglar til å pynte med i hagen. Lys, blomar og serviettar er det alltid kjekt å få. Eg likar sånt "stæsj". Eg fekk dette fine nettet til å sette over maten på hagebordet, kjekt. Denne oppmuntringskalenderen har fått plass på skrivebordet. Ordet for i dag er; Det som er gjort i kjærlighet, varer evig. Ein ny fuksia til hagen. Det kan aldri bli for mange blomar i hagen! Nydelege kort fekk eg også. I dag har eg pynta litt i hagen av noko av det eg fekk. Desse småfuglane fekk eg også frå Berit Vakker "blå blom", alle veit at blå er favorittfarge. Tusen takk til alle som var med å gjorde gårsdagen til ein fin dag for meg :)