Sunshine. / Sol ute, sol inne.

Denne helga har eg vore på "bli ny helg" i regi av Normisjon. Tema famna heile menneske, ande, sjel og kropp. Det har vore ei helg der deltakarane har fått seinka skuldrene og lagt frå seg kvardagen sitt stress og mas. Godt andeleg påfyll, vakker song og musikk, nydeleg mat og ikkje minst gode sanseinntrykk. Laurdagen kom ei som var frisør og hadde demonstrasjon. To frivillege fekk ny firsyre (klypp og farge). Dei fekk også lagt sminke og gode tips om fargeval. Fysioterapeut hadde treningstimar med fleire grupper, der me fekk lære litt om rett måte å trene på. Pyntinga hadde vår og nytt liv som gjennomgangstema.

Då eg kom heim etter to dagar hadde det begynt å spire og bløme i hagen. Tidlege tulipanar har fine marmorerte blad. Snart kan eg gle meg over dei minste påskeliljene. Vår-irisen strekker lange lyse stilker mot sola. Desse er eg ekstra spent på sidan det er første året eg har dei. Løytnantshjarte har fantastisk vakre raude skot. Vårlyngen har blømd sidan juletider, men var lenge gøymd under snøen. Euphorbia 'Red Wings'  står alt i full flor. Lilla og gule krokus sprett opp overalt, både i bed og i plen. Under rosebuskane har nokre stemorsblomar overlevd vinteren, dei har opna den aller første knoppen. Dette må vere ein av dei minste stemorsblomane eg har sett. Tulipanane eg viste og delte med bloggleserane mine før helga hadde takka for seg medan eg var borte. Dei hadde drukke opp alt vatnet sitt stakkar... Eg måtte innom bloggen min straks eg trødde innafor døra heime og der venta det mange koselege helsingar på meg. Tusen takk til dykk som har lagt igjen kommentar på innlegget under :)

Ønskjer alle som kikkar innom hos meg ei god veke :)